鐵達尼號點解唔打撈？

繼續同史友們介紹一啲歷史上嘅謎題，如果要講到現今世上最重大嘅沉船事故，相信大家都會即時諗到鐵達尼號。鐵達尼號至今已經沉沒咗百幾年，理論上船身內部係有唔少值得發掘嘅物品，但點解直到依家都唔進行打掘工作呢？

呢艘喺1912年4月10日由英國南安普頓出發駛往美國紐約嘅巨無霸，喺啟航四日之後不幸同冰山相撞，喺緊急補救無效之下，船隻最終攔腰斷裂沉入大海，船上超過1500人死亡。要知道當時能夠搭上呢艘船嘅人都係非富則貴，船上唔單止有珍貴嘅財物，同時亦都有好多值得研究嘅文物，咁點解一直以嚟都唔進行打撈工作？

雖然話現今科技已經變得發達，但鐵達尼號所在嘅位置係3700米嘅海底，連陽光都無法到達，而且海水嘅壓力相當之大，唔係咁容易可以到達。喺1985年就曾經有海底探測器嚟到呢度進行探測，發現船身基本上已經成為海床一部分，鐵制嘅船身基本上冇可能浮得起身！而且喺海水及微生物侵蝕之下，船身基本上喺2030年左右就會所剩無幾，而各種打撈計劃無奈地都無法進行！