喺四川嘅彭山區內一直都流傳住一句關於寶藏嘅民謠「石龍對石虎，金銀萬萬五，誰人識得破，買到成都府」，而呢句說話其實就係關於明末農民起義軍領袖張獻忠喺兵敗身死前所埋藏寶物嘅所在地。

關於呢批寶物歷代以嚟都有唔少傳言，但到底咁多年之後張獻忠沉銀之謎係點樣被解開呢？阿史今次就同大家講一講啦！關於張獻忠寶藏，其實就係因為喺1646年張獻忠向川西撤退過程中，因為不敵當地軍閥楊展而被逼再次逃竄。咁既然要走佬，就當然要先收埋喺四川各地搶返嚟嘅財富，於是佢就將呢啲寶物沉入江底！據南明史料《流賊張獻忠禍蜀記》所記「獻忠離成都，率賊營男婦百餘萬操舟數千蔽岷江而下……所掠金玉珠寶及銀鞘數千萬，悉沉江底。」所以，歷代以嚟就有張獻忠沉銀之謎。

之不過關於具體位置嘅記載就一直都搵唔到，後世亦都好難單憑一篇史料就進行發掘，但係隨住楊展、《彭山縣誌》當中每隔一段時間都有張獻忠沉銀嘅發現，基本上可以肯定張獻忠沉銀係確實存在，但到底有冇被撈走曬就仲係一個謎。

直到2005年，為咗緩解四川部分地區旱情，彭山飲水工程正式施工，呢個舉動亦都令到岷江江口鎮段江心處開挖河床，出土咗七個「大西眉州征完元年」銀錠，正正就係張獻忠國號，張獻忠沉銀之謎就係咁樣被解開！但後來亦都引發一連串盜寶行動，咁當地政府同埋考古團隊又係點樣進行保護呢？下回再同大家分解！

原圖嚟自網絡