响《三國演義》裡面，曹操走華容道同關羽義釋曹操嘅故事，相信史友們都耳熟能詳，亦令後世對關羽留下咗義薄雲天嘅形象，咁响歷史上，曹操係咪真係走過華容道呢？

華容道位於依家中國湖北省監利市境內，呢個地方响古代的確係真實存在。至於關羽响華容義釋曹操就係元朝開始响民間小說同戲曲中創作出嚟。不過咁，據史籍所載，曹操响赤壁之戰大敗後的確係走過華容道。响《三國志》注引《山陽公載記》中，就有過到曹操從華容道逃走嘅經過：「公船艦為備所燒，引軍從華容道步歸，遇泥濘，道不通，天又大風，悉使羸兵負草填之，騎乃得過。羸兵為人馬所蹈藉，陷泥中，死者甚衆。」即係話曹軍走呢啲條路一啲都唔順，仲割草填地，好多衰弱疲憊嘅士卒（即羸兵）因為「為人馬所蹈藉陷泥中」，就咁响條華容道死咗。嘩！個畫面諗起都幾得人驚。

原圖：電視劇《新三國》劇照