唔知史友們有冇幻想過現今嘅藝術拍賣市場咁興盛，假如拍賣途中有啲文物突然被判定為「國寶」，咁樣嘅情況又會點算好呢？近排喺法國就真係發生咗一件咁樣嘅事，阿史今次就同大家講一講啦！

近排喺法國嘅Artcurial 拍賣會上，法國著名靜物畫大師夏丹嘅作品（Jean Siméon Chardin）《野草莓籃》以2680萬美元（約2.1億港元）售出，即時打破咗呢位藝術家嘅銷售紀錄，之不過呢個交易好快就被羅浮宮向法庭申請禁令叫停，到底係點解呢？

喺歐洲其實各個國家都經常會將呢啲藝術品宣佈為國寶以防止被銷售出口，今年英國政府都曾經禁止過印象派大師保羅·塞尚（Paul Cézanne， 1839-1906）風景名畫《夏季的諾曼第農莊(阿唐維爾)》出售。一旦踏入咗咁樣嘅情況，相關申請禁令嘅機構就需要喺一定時間內籌集資金回購作品，但按羅浮宮以往20%門票收入（ 600 萬至 700 萬美金）嚟計，再加上近年受到疫情影響，再成功收購作品都唔係咁容易！

原圖嚟自網絡