喺古代嚟講大部分嘅朝代都係「萬般皆下品，唯有讀書高」，但其實各行各業都可以出到狀元，而喺清朝嘅宮中，就有一個職位唔需要太學識，表面人工唔高但就人人都爭住比錢做，今次阿史就同大家介紹下啦！ 

阿史所講嘅呢份職業就係喺國庫之內搬運銀兩嘅庫工喇！普遍嚟講呢啲庫工都係以滿人為主，一般任期就只係得三年，而要想做到呢個職位，就要先向尚書送出一筆銀兩先有機會！為咗保障國庫安全，其實庫工出入庫房都要經過嚴格檢查，甚至有時仲要一絲不掛咁入去，出嚟嘅時候就要雙臂平舉，兩腿微蹲，學兩聲鵝叫證明冇私自帶銀兩先可以離開。

雖然檢查得好嚴格，但唔少庫工都有自己嘅方式偷運銀兩。庫工呢門職業好多時候都係子承父業，唔少人都係由細到大練習喺肛門藏銀，簡單嚟講每次出入都可以收埋五個十兩銀錠，而本身收咗錢嘅庫工主管都會容許佢哋咁做，所以呢門工作都真係有唔少油水！

原圖嚟自網絡