4000年前夏朝點解難以被承認?

繼續同史友們討論一啲具爭議嘅中國歷史問題，其實由細到大大家都必定喺教科書度讀過中華文明有五千年歷史，而中國最早嘅王朝就係夏朝。之不過，其實夏朝到底存唔存在，其實歷年都有唔少爭議，咁到底點解我哋連五千年歷史嘅良渚遺址都發掘到嘅時候，偏偏夏朝嘅存在就咁難被證明？今次阿史就同大家講一講啦！

首先，要證明一個朝代存唔存在，其中一個最重要嘅一個因素就係到底呢個朝代有冇文獻記載。夏朝之所以咁難被證實存在，其中一個原因就係極少文獻可以證明到呢個朝代存在，留低落嚟關於夏朝嘅記載都係以神話居多，所以呢一點並唔足以成為證據。

而另一個原因就係同考古發掘有關。雖然我國嘅考古發掘係搵到唔少距今五千年歷史嘅遺址，殷墟嘅出現亦都證實到商周嘅存在，但係目前就仲未搵到一個可以完美切合到距今4000年歷史嘅夏朝遺址，亦都仲未有滿足到夏朝規模嘅遺跡，所以夏朝嘅存在難以被承認。