尋日就同史友們介紹咗五胡亂華點解會係中國歷史上最黑暗嘅時期，正所謂亂世出英雄，咁到底呢個時期係由邊個人物現身拯救人民呢？今次阿史就同大家介紹下呢位中國歷史上最血腥嘅英雄，冉閔。

喺五胡亂華呢個時期，中原漢族就面對一場大危機，喺胡人軍隊所到之處都經歷燒殺搶掠，屠城掠地千里，北方漢人數量急劇下降。冉閔就係喺呢個時期成長，佢幼年係一個孤兒，後來被石虎收養。喺公元350年冉閔率軍於凌水河畔大敗鮮卑燕軍二十萬，擒斬燕軍七萬餘人，篡奪後趙建立五胡亂華時代中原第一個漢人建立嘅政權。

而喺佢即位後，佢第一件事就係頒布「殺胡令」，凡係有胡人特徵嘅人一律是殺無赦，就係呢個舉動足足令到三十二萬羯族族人死亡。喺羯族滅種後，佢就繼續揮軍西進殲滅三十多萬匈奴騎兵，甚至仲表明「內外六夷，敢稱兵仗者斬」。結果，氐、羌、匈奴、鮮卑數百萬人退出中土，各自返還隴西或河套草原一帶原來生活地方。有人認為佢係一個暴君，亦有人認為佢係中國歷史上最血腥嘅英雄，唔知史友們又點睇呢？

原圖嚟自網絡