今日係五一勞動節嘅日子，全世界有多達八十幾個國家都會一齊響應呢個節日，甚至有啲國家仲會有勞工假放，咁到底呢個節日又係點樣嚟？點解當時嘅人又會開始關於勞工嘅問題呢？今次阿史就同大家講一講啦！

其實最早嘅勞工運動係始於歐洲，當時經過工業革命後，歐洲亦都正式由農業社會轉型為工業社會。之不過呢種轉型係會帶嚟一種問題，就係喺提升生產力嘅同時必然係會加重勞工嘅工作量以及工時，嚴重嘅時候勞工甚至需要每日工作超過十四小時，而且仲冇得休息。於是，喺1856年4月21日，澳州嘅石匠就舉行咗一場大規模罷工事件，作為爭取八小時工作制運動嘅序曲。

澳州石匠呢次嘅舉動就啟發咗美國工人展開罷工，喺1886年的5月1日甚至仲出現過工人發起嘅總罷工，但由於過程芝加哥警察對工人展開驅散，有不明人士向警方投出炸彈，事件引發芝加哥警察對工人開火還擊，最終導致7名警察、至少4名平民死亡，仲有幾百人受傷，呢件就係著名嘅「乾草市場事件」。

「乾草市場事件」引起國際關注，1889年7月14日，世界工人運動組織「社會主義國際」喺巴黎舉行成立大會，並通過《五一節案》，將每年五月一日定為國際勞工節，以紀念當年芝加哥大罷工，後來就有更多國家加入呢個行動，演變成今時今日嘅「五一國際勞動節」。

原圖嚟自網絡