西晉末都有百姓起事？

以前讀中史讀到西晉時，唔少內容都會講外族入侵五胡亂華之類，其實西晉後期亂事就唔止外患，仲有內憂，包括民變。

响西晉後期就有一場李特起兵嘅亂事。呢場起事就關係兩位核心人物，趙廞同李特。趙廞本來係益州刺史，後嚟就被朝廷詔徵為大長秋，入宮主理宮中事宜，佢本來益州刺史之位就由成都內史耿滕代之。趙廞見晉室衰弱，於是就造反，包括開倉派米爭取民心，仲有招攬流民首領李特做佢馬仔。最後趙廞殺咗耿滕，自稱大都督、大將軍、益州牧。而呢個反抗勢力就响巴蜀至天水一帶作亂。

不過咁，李特呢位人士就唔係乜嘢好心，好快佢就調轉槍頭，揮軍攻入成都，殺咗趙廞，仲將遣使到洛陽，陳述趙廞罪狀，歸附晉室。李特後嚟又叛晉自立，佔據巴蜀唔少地區，最後當然係劍指成都。但成都太守羅尚就以計策令李特中招，李特就响孤軍深入時被羅尚聯軍擊潰，李特被殺後首級亦送到去洛陽。