司馬遷被稱為太史公，佢首創紀傳體撰史方法為後世正史傳承作出重大貢獻，要記載咁龐大嘅資訊，有錯都係在所難免。而喺一次考古發掘出土嘅文物當中，就有一件文物揭露司馬遷寫錯名二千年！今次阿史就同大家講一講啦！

喺廣州有一座叫做「象崗山」嘅小山崗，由於地理位置極為重要，所以喺近代就曾經被列為軍事禁區。而喺1983年，當時就有工人展開工程期間，無意之中發現到地底有一個巨洞。喺進入考察之下就發現到當中有一個巨型古墓。

喺考古團隊發掘之下，就喺呢個埋葬喺山腹之中17公尺嘅古墓當中，搵到一座王侯級別嘅大墓並且出土過萬件文物。喺當時搵到嘅青銅器當中，就有一件刻有「文帝九年樂府工造」幾個大字，而文帝正係南越第二代國王趙胡。

睇到呢度大家都可能會以為呢座墓主人係叫做趙胡，但隨住呢一件文物「印章」出土，上面清楚寫住「趙眜」二字就引起考古團隊嘅懷疑。結果喺翻閱史料查證之下，就證實墓主人理應係司馬遷《史記》中所記載嘅趙胡，之不過印章就表明墓主人叫做「趙眜」。換言之，呢項有力嘅證據就表明南越第二代國王係叫「趙眛」而非「趙胡」，太史公當時可能因為資料不實而寫錯名！

原圖嚟自網絡