「分一杯羹」 分嘅到底係咩肉羹？

喺形容人與人之間分享利益嘅時候，大家通常都會用到「分一杯羹」呢個成語，咁到底古代所講嘅分一杯羹係分啲咩羹呢？今次阿史就同大家講一講啦！

要講「分一杯羹」呢個成語，就要由《史記·項羽本紀》講起。喺鴻門宴之後，劉邦就成功逃走並且令到楚漢兩軍形成一個長期對峙嘅局面。雖然強如項羽，但項羽都係會擔心呢種場面會對自己不利。於是，項羽就派人捉咗劉邦嘅父親，並且將佢放咗喺一個大鍋入面，並揚言如果劉邦再唔投降，佢就會將劉邦父親煮成肉羹嚟食。

正常人聽到呢度，都會即時投降去換返自己父親，之不過當時劉邦就回應話，「吾與項羽俱北面受命懷王，曰『約為兄弟』，吾翁即若翁，必欲烹而翁，而幸分一杯羹。」呢句說話大概嘅意思就係指劉邦同項羽昔日係結拜兄弟，所以自己嘅父親亦都係對方嘅父親，如果項羽要煮咗自己嘅父親，咁唯有希望對方可以分一杯肉羹畀自己。