如果史友們有留意開我國嘅考古文物新聞，應該都會注意到陝西不時都會有地上地下嘅文物被頻繁發現。作為一個文物大省，煩惱嘅地方唔單止係要諗點樣進行發掘，仲要諗點樣先可以真正保護到呢啲國家嘅文化遺產。

作為中華民族、華夏文化的重要發祥地之一，陝西喺歷史上就有十三個王朝喺度建都，唔單止有豐富嘅歷史文化，仲有各式各樣嘅文物遺存，單單係不可移動嘅遺存全省就已經有49058處，博物館全省共有319家，館藏文物774萬幾件，呢個數目真係相當誇張！

誇張嘅數字背後，亦都意味住其實以往係有唔少文物犯罪案件，亦都有唔少重要嘅文物被盜賣。而為咗解決呢個問題，陝西省公安廳堅持「零容忍」態度。並且連續十年展開「鷹」系列行動，唔單止追繳文物近三萬件，而且仲喺2020、2021年全省盜竊田野文物案件實現零發案，真係相當大嘅成就！

原圖嚟自網絡