自古以嚟嘅戰爭，從來都係以人數之多為優勢，以小勝多嘅戰爭就真係少之又少。嚟到近代，最為經典嘅事蹟莫過於就係曾國藩以幾萬湘軍打敗幾十萬太平軍，到底面對呢個人數差距，湘軍係點樣戰勝呢？今次阿史就同大家講一講啦！
喺1851年1月，洪秀全就帶領上帝會喺廣西桂平縣起事，創立太平天國之餘仲建立埋太平軍，雖然途中清軍多次嘗試圍剿，但太平軍當時就好似係勢不可擋，一路入湖北、攻佔武昌、仲將南京定為都城天京，對清朝嚟講絕對係一個大威脅。
為咗應對太平軍，咸豐皇帝先係任命前廣西提督向榮、陝甘總督琦善為欽差大臣，組成江南、江北兩座大營圍攻天京；而另一方面就係任命本籍官員任團練大臣，負責每個省嘅團練事務。當時曾國藩只係一介書生，但最終都經左宗棠、郭蒿森等人勸說，替代原湖南巡撫帶兵打仗。
曾國藩對太平軍相當仇視，深知八旗兵以及綠營都已經變得腐敗衰弱，咁亦都促使佢「以儒生領山農」，招募嘅軍人多數都係深山寒谷貧苦之民，身壯力健之餘仲相當忠誠，只聽命於營官。喺曾國藩一輪改組擴編之下，先係「以思想紀律教育優先，技術性訓練次之」，以湘鄉人為主嘅湘軍就咁建成。
《湘軍兵志》記載湘軍建軍標準就係「呼吸相顧，痛癢相關，赴火同行，蹈湯同往，勝則舉杯酒以讓功，敗則出死力以相救」，既有陸軍、又有水師，最多人數嘅時候都不過係十萬，但更多時候湘軍就只係得幾萬人，但一樣嚴守紀律、裝備精良嘅軍隊，就已經足以打敗動輒可以召集五六十萬嘅太平天國。
原圖嚟自網絡