成日都話，工作主要都係服侍老闆，老闆開開心心固然會平安無事，但只要有乜嘢搞到老闆唔高興，咁就可能工都無埋。不過，响古代出現咁嘅情況，如果老闆係皇帝，可能分分命都無埋之餘，仲要禍及家人。
阿史講緊嘅，就係南北朝北魏時期嘅國史之獄。响北魏初年，名臣崔浩當政。呢位崔浩係嚟自漢人名門，出身清河崔氏，而佢曾仕北魏道武、明元、太武三帝，官至司徒，响朝中有好大影響力。北魏太武帝滅佛，同佢推崇道教主張廢佛有關。
咁好似佢咁嘅權臣，但最後竟然因為修國史而出事。話說崔浩同弟弟崔覽、鄧穎、晁繼、黃輔等人共同著述《國書》，而呢本國書其實係一本國史，但佢修國史時不避忌諱，直書一啲拓跋氏皇帝唔多想俾人知嘅早期歷史，太武帝知道後嬲到震，於是殺咗崔浩。而崔浩宗族以及佢嘅姻親、高門士族范陽盧氏、太原郭氏、河東柳氏全數受到株連，真係陰公。
原圖嚟自網絡