近代嘅晚清面對列強企圖瓜分中國領土，政局動蕩，唔少知識分子嘗試以自己嘅力量改變國家。要喺失敗之後重新企起身本來就需要好多勇氣，但喺面對失敗仍然坦然面對呢個結果，企圖以自己嘅死喚醒國人，呢種氣慨就更加難得！
喺晚清即將傾覆之時，有一班知識份子企咗出嚟發動一場史稱「戊戌變法」嘅運動，可惜呢場變法始終改變唔到清政府。可能係因為晚清政府相當腐朽、可能係因為變法變得太急進，最終變法嘅後果就係換嚟光緒被軟禁、康有為梁啓超倉皇逃走。
而其實喺變法失敗之際，梁啓超係得知消息並且通知咗譚嗣同一齊逃走，之不過呢個提議就被毅然拒絕。其實喺譚嗣同死前，佢就喺獄中寫落「望門投止憐張儉，直諫陳書愧杜根。手擲甌刀仰天笑，留將公罪後人論」一詩表明心跡，據講後來就被梁啓超改編成「我自橫刀向天笑，去留肝膽兩崑崙」嘅版本。而詩中就表明咗佢對呢次失敗嘅不甘、困惑，並且希望可以「以我血薦軒轅」，所以佢亦都對梁啓超講出「今未聞中國有因變法而流血者，此國之所以不昌也，請自嗣同始。」
就係咁，喺戊戌變法失敗第八日，譚嗣同等六人就喺菜市場被斬首。
原圖嚟自網絡