昔日香港著名景點、全世界最大嘅海上食府珍寶海鮮舫，下月將會拖離香港，珍寶於2020年3月停業，估唔到兩年後仲要移離香港，靜待新經營者出現。
珍寶海鮮舫係昔日香港仔避風塘最大嘅海上食府，昔日連同太白、海角皇宮組成珍寶王國。珍寶係响上世紀七十年代出現，當時商人何鴻燊同鄭裕彤等人就從王老吉手上將本來裝修好但又發生火燭嘅珍寶海鮮舫收購落嚟，經重新修理後珍寶海鮮舫新船响1976年正式開業。去到1980年同1982年，太白海鮮舫同埋海角皇宮都畀珍寶收購，三隻海鮮坊就停泊响深灣，成為世界馳名嘅海上食府。唔少訪港旅客都好鍾意上船去食返餐，壁畫、皇帝龍椅更加令遊客覺得好好玩。
據報道指，响珍寶海鮮舫停業之後，持有海鮮舫嘅新濠國際原本無償捐俾海洋公園，作為「躍動港島南」計劃一部分。但海洋公園方面未能搵到合適嘅機構營運，所以未能落實珍寶海鮮舫捐贈計劃。珍寶海鮮舫嘅海事牌照將於今年六月到期，由於珍寶海鮮舫短期內無可能復業，香港又無俾珍寶海鮮舫停放嘅船廠泊位，所以將珍寶海鮮舫移離香港。