今日對所有國人嚟講都係一個相當重要嘅日子，事關中國第三艘航空母艦「福建艦」下水命名儀式喺今日就正式喺中國船舶集團有限公司江南造船廠舉行！
作為我國第三艘航空母艦，經過中央軍委批准之下，就正式命名為「中國人民解放軍海軍福建艦」，舷號為「18」。咁明明航空母艦之前都有兩艘，點解第三艘「福建艦」又會咁廣受外界關注呢？咁阿史就要同大家詳細介紹下啦！
要知道我國目前就已經有兩艘航空母艦服緊役，分別係2012年嘅遼寧艦以及2019年嘅山東艦。遼寧艦嘅前身其實係前蘇聯海軍庫茲涅佐夫級航母二號艦—瓦良格號改裝而成，而山東艦就係基於對遼寧艦進行研究之後而自主設計以及研建建造嘅常規動力航空母艦。至於呢次嘅「福建艦」就更加犀利，直頭就係我國完全自主設計建造嘅首艘「彈射型航空母艦」，同以往嘅滑躍式甲板設計起飛唔同，呢次福建艦採用平直通長飛行甲板，配置電磁彈射（EMALS），滿載排水量仲達到8萬噸，真係誇張！
「福建艦」下水後雖然仲要按計劃開展系泊試驗以及航行試驗仲未服役，但已經係一次相當大嘅突破喇！
原圖嚟自網絡