有46年歷史嘅珍寶海鮮舫上周啟航離港，行駛至南海西沙群島附近水域時遇上風浪最終沉沒，事後船主方面並無公開詳細資料。不過，事件又有新發展，因應傳媒查詢有關珍寶海鮮舫事宜，海事處發言人昨日夜孖孖就回應話，响傳媒報道珍寶沉沒消息前，海事處並未接獲船東通知，海事處响得悉有關報道後，已立即要求船東提交書面報告，海事處昨日就終於收到船東經其代理人所提交嘅書面報告嘞！
根據船東提供嘅資料，珍寶响六月十八日晚上，被遠洋拖船「JAEWON 9」拖航至南中國海西沙群島水域時，因遇上惡劣天氣而傾覆。目前，珍寶同埋該拖船仍然响西沙群島一帶水域海面，船東會繼續跟進處理云云。
咦，仲係「海面」？咁係咪即係代表珍寶海鮮舫仲有一線生機呢？相信除咗阿史外，普羅市民都會好關心囉。