中國嘅飲茶文化有住源遠流長嘅歷史，茶同文學、書法、甚至禪宗都有唔少關連，甚至飲茶呢件事本身就已經係一種文化，衍生出獨有嘅茶器以及茶藝，令飲茶嘅人可以喺一道道繁雜瑣碎嘅步驟當中體驗到恬靜、淡泊嘅境界。之不過，唔知史友們又知唔知，其實唔同朝代嘅人飲茶其實都有好大分別，想安安樂樂咁飲一杯茶原來都唔係咁易！
喺飲茶文化真正喺中原興盛之時，亦即係唐朝嘅時候，雖然古人都會將茶飲當做一種單獨嘅飲品，但更多嘅人會喺茶當中加入辛香料好似花椒、蔥、薑、蒜等等，仲會煮成一大鍋慢慢品嚐，所以果時「飲茶」又會被稱為「吃茶」。而喺同一個時期，「茶聖」陸羽、「茶仙」盧仝亦都開始就品茶呢件事寫下《茶經》、《走筆謝孟諫議寄新茶》等作品。
由於經歷過唐朝興盛嘅茶文化，去到後來宋朝甚至仲流行起「鬥茶」去品評茶質優劣。之不過一去到明朝，朱元璋就認為呢種飲茶法太過繁複，都唔似係飲緊茶，所以就展開化繁為簡，「泡茶法」以及茶壺等茶具都係呢個時間開始演化。
原圖嚟自網絡