早幾日阿史就同史友們講到明朝開國皇帝明太祖朱元璋因為生性多疑，喺眾多開國功臣當中，凡係有啲出眾能力嘅都幾乎被佢以各種理由殘害。通經史、曉天文、精兵法嘅劉伯溫深知朱元璋品性，選擇功成身退，縱情山水，但都無奈被胡惟庸暗中陷害，最終病重而死。
而呢位一代謀略大師，其實臨死之前仲做咗一件事，令到生性多疑嘅朱元璋相當擔心。喺洪武八年，64歲劉伯溫臨死前，就同兩個仔劉璉、劉仲表明，佢寫下嘅呢本《百戰奇謀》記載咗自己生平所見所聞以及對大大小小戰役、時事嘅觀察，但因為當今皇帝生性多疑，可能會令全家人深陷危險當中。
由於劉伯溫本人充滿傳奇色彩，所以呢本書亦被民間認為係有能夠推翻明朝嘅秘密。朱元璋得知此書存在，就喺劉伯溫發喪之時專門派出兩個使者打探，但遲遲搵唔到呢本書亦都令佢一直寢食難安。咁到底呢本書係咪真實存在？定還是只係劉伯溫佈下嘅一個局？史友們又點睇呢？
原圖嚟自網絡