尋日就同史友們講到劉伯溫去世前憑住一本書令到朱元璋擔驚受怕，甚至仲令佢以為書中會有能夠消滅明朝嘅秘密。由於神機妙算劉伯溫係明朝當時一位相當出色嘅軍事謀略家、政治家，生性多疑嘅朱元璋喺胡惟庸多次進言之下，唔單止多次為難劉伯溫，甚至喺劉伯溫死後仲搵人秘密地挖開劉伯溫棺材。
胡惟庸出於妒嫉，生平多次排擠陷害劉伯溫，甚至喺劉伯溫揀好一片風水寶地之後，仲同朱元璋講，劉伯溫嘅墓地係有「天子之氣」，足以令到佢嘅後代可以成為帝王。換言之，即係劉伯溫想爭奪明朝嘅江山。聽到呢度，朱元璋當然就好嬲，即時下令要劉伯溫返到自己家鄉。
返到家鄉嘅劉伯溫冇幾耐就離世，但朱元璋內心仍然多疑，暗中就搵人鋸走劉伯溫嘅棺材頭部以消「天子之氣」。之不過，料事如神嘅劉伯溫當然知道會有呢一著，當士兵打開棺材之後唔見屍首，但竟然發現一本《大明律》，打開就驚現「開棺見屍者斬」六字。
原來訂立呢本《大明律》嘅人正正就係劉伯溫及李善長，其中一條律法係得到朱元璋批准，就係凡盜墓或者私自打開他人棺材都要被處以死刑。得知呢個情況，朱元璋當堂嚇咗一跳，並且下令以後唔准任何人再私挖墓地。
原圖嚟自網絡