今時今日由於冷氣嘅出現，無論任何季節都可以打邊爐，甚至仲有唔同食材、幾種鍋底。之不過，到底邊爐喺古代嚟講又有咩款式，古人又會食啲咩食材呢？
其實早喺商周時期，古人就已經以盤鼎盛載食材，盤下放置碳火加熱，形成初代嘅邊爐，而去到漢代，邊爐嘅款式就更加多，甚至仲有專門嘅銅鍋畀人打邊爐。而講到最犀利，就係喺江蘇盱眙縣大雲山西漢墓中，就曾經出土過一個青銅分隔鼎。
呢個分隔鼎並唔係普通嘅器具，而係當中以隔板分為5個區域，所以又被稱為「五格濡鼎」，據學者研究呢種製法係墓主西漢第一代江都王劉非根據陰陽五行學說而做。而喺當時，古人打邊爐除咗會食牛肉、牛百葉、羊肚呢啲食品之外，原來仲會食馬鞭、雁肉、甲魚等等食材，真係估佢唔到！
原圖嚟自網絡