嘩嘩嘩，睇到有寺廟供奉真係日本戰犯牌位本來就已經人神共憤，但最離晒大譜嘅係，呢種事竟然係發生喺南京！
近日就有內地網友報料，指今年年初喺南京玄奘寺遊覽果陣，就意外喺寺內發現到有供奉緊南京大屠殺戰犯嘅牌位。消息一傳出之後，唔少網民都狠批估唔到呢件事會發生喺中國！而南京嘅民族宗教事務局亦都火速對寺院進行整頓。據網民嘅影片顯示，呢幾個牌位其實就設置咗三年左右，牌位名稱嘅四人其實分別係南京大屠殺主犯田中軍吉、南京大屠殺甲級戰犯松井石根、乙級戰犯谷壽夫，以及丙級戰犯野田毅。田中軍吉就喺南京大屠殺期間殺害超過三百個中國軍民，佢更加出現喺一張歷史照片當中，當時佢就係頭戴軍帽身穿白襯衫日本軍官，砍殺跪地中國青年。至於松井石根係日本陸軍大將，更加係十四個甲級戰犯之一，最終就被遠東國際軍事法庭作為甲級戰犯判處絞刑，真係罪大惡極。
事件發生後，雖然當局已經即時糾正，但唔少內地網民都反思一個問題，就係估唔到喺譴責靖國神社嘅同時，我國竟然都有人暗地「拜鬼」！
原圖嚟自網絡