提起趙飛燕呢個人物，相信唔少史友都會諗起「環肥燕瘦」呢個詞，當中嘅「燕瘦」自然係指趙飛燕，甚至傳說佢舞姿輕盈如燕飛鳳舞，仲能夠作掌上舞。但唔知史友們又知唔知，其實趙飛燕喺歷史上仲被稱為「天下第一妖姬」？到底當中有咩原因？阿史今次就同大家講一講啦！
出身平民嘅趙飛燕，喺佢被生下冇耐就被拋棄，佢嘅父親趙臨只係官府家奴， 但就將佢抱回家中撫養成人。趙臨可能諗都冇諗過，一個路邊棄嬰長大之後竟然係絕世美女，仲成為陽阿公主府上歌妓，因舞姿輕盈如燕飛鳳舞所以得名「飛燕」。
趙飛燕嘅前半生就係咁，咁佢又係點樣飛上枝頭變鳳凰呢？喺漢成帝一次微服出巡之時，一嚟到陽阿公主府就已經被趙飛燕絕妙舞技所迷，先係將佢招入宮中大為寵幸。後來，連同趙飛燕妹妹趙合德都同樣被招入宮中，兩姐妹「俱為婕妤，貴傾後宮」。當時許皇后、班婕妤等人皆失寵，許皇后甚至仲因為蠱詛他人被廢，就算太后多次反對，但趙飛燕仍然可以順勢成為皇后。
趙飛燕可能話係單憑一隻舞，就以驚人嘅速度由一位歌妓飛上枝頭成為皇后，而後宮一旦有咩妃子懷上漢成帝嘅胎兒，都會被除去。就係一位咁樣嘅「紅顏禍水」足足統領後宮十幾年，亦都令到漢成帝劉驁一個子子嗣都冇，難怪會被稱為「天下第一妖姬」。
原圖嚟自網絡