剛才就同史友們講到清代有個職位叫做「攝政王」，歷朝就只有兩個人曾經做過，而佢哋所擁有嘅權力甚至仲比皇帝更加大。有史友就想阿史講多啲古代嘅官職，咁就當然冇問題啦，今次就介紹下「一品誥命夫人」啦！
喺唔少古裝劇當中，我哋都可以見到某位夫人被封為「誥命夫人」嘅場景，而對於呢個官職，其實喺唐、宋、明、清各朝代高官嘅母親或者夫人都有機會可以做到，咁到底呢個官職係需要做咩呢？
要做「誥命夫人」其實係有幾個條件，除咗要係高官嘅家人之外，喺兒子或者老公任官期間，呢位夫人就需要有好好勸導佢哋做官，去到真係對國家、朝廷有貢獻果陣，成為「誥命夫人」嘅機會就嚟喇！
喺明清時期其實就已經有一套完整嘅誥封制度，一至五品官員授以誥命，六至九品授以敕命，所以如果做得「誥命夫人」，身份亦都唔簡單，至於係幾品，就要睇返佢家人嘅官職喇！雖然「誥命夫人」只有俸祿並冇實權，但其實暗地都有好多特權，就好似如果佢哋犯咗法，地方官係唔能夠審佢哋。而假如真係咁好彩做到「一品誥命夫人」，最大嘅特權就係可以出席皇家宴喇！
原圖嚟自網絡