講到日本強佔台灣並進行殖民管治，除咗皇民化之外，當時日本政府响各個方面都實行日本化。阿史有一次去台灣高雄市，就發現當地有個地方叫美濃。咦！打過暗榮信長野望系列嘅史友都知美濃係日本中部一個地區，咁點解呢個名又會响台灣出現呢？自然係同日佔時期有關。
台灣响日佔時期，好多地方就被改咗同日本有關嘅名，有啲名就係將原本地方名消除改上去，有啲就係個地方响被開發後被強加個新名。好似台北市松山區，以前就叫做錫口，而松山係日本四國一個地方；台中牛罵頭就改名為清水，清水係日本靜崗一個地名；花蓮有個地方叫水尾，又被改名為瑞穗，原因係水尾讀音同日文瑞穗相似。其實呢啲例子仲有好多，而且到今時今日台灣好多地方仲係用緊呢啲名。
其實日本政府呢個做法，响日本侵佔其他地區時都會用到。好似香港日佔時期，香港好多街道同地方都被改個「日本名」，好似皇后大道東叫東明治通、油麻地叫香取區等。呢啲真係徹頭徹尾入侵者殖民管治嘅手法。
原圖嚟自網絡