香港故宮文化博物館有大量國家級嘅珍貴文物睇似乎都已經唔係咩新聞，而近日館內嘅8號展廳特別展覽「國之瑰寶：故宮博物院藏晉唐宋元書畫」就開始展出第二期嘅國寶級古代書畫名品，阿史今次就帶大家睇一睇啦！
喺呢批書畫名品當中，最為矚目嘅必定係曾經認為係東晉繪畫名家顧愷之(346–407 年)所作嘅千古名作《洛神賦圖》。《洛神賦圖》係以三國曹植文學作品《洛神賦》為靈感來源繼而創作嘅畫作，以虛構嘅形式將曹植與洛神之間淒美愛情故事展現出嚟，描繪男女之間由邂逅到分離、人與神之間愛情失意感傷情懷，就咁聽都覺得相當吸引。
《洛神賦圖》繪畫技法古樸稚拙，保留有六朝繪畫遺韻，曾經被傳為係東晉繪畫名家顧愷之嘅作品，亦係乾隆珍藏多件《洛神賦圖》中，被評為「洛神賦第一卷」嘅存在。
經歷幾百年、甚至千年流轉，呢件作品以及其餘15件國家一級文物一齊喺呢次特別展覽當中展出。喺完成一個月嘅展期後，呢批書畫就要返到故宮休眠至少三年，機會相當難得！
原圖嚟自網絡