成吉思汗鐵木真能夠成為一代霸主，令中亞以至東亞各國膽顫心驚，除咗佢本身有一定軍事才能外，仲同佢手下一大批猛將有關。如果熟悉呢段歷史嘅話，都知佢手下有「四傑」、「四狗」、「四子」，以前（打機個）阿史就覺得好奇怪，點解佢會手下叫「狗」？
成吉思汗麾下「四狗」，就係速不台、哲別、忽必來同者勒蔑。佢哋都係幫成吉思汗打天下嘅猛將，仲要係跟從多年個種。至於點解被稱為「四狗」呢？源於鐵木真有一次帶同佢哋四個去拜會札木合，當時札木合就大讚佢哋勇猛善戰，所以就叫佢哋做「四狗」。因為蒙古人係遊牧民族，每家每戶都會獵狗，所以對蒙古人而言狗係非常重要，札木合叫佢做「狗」，其實係一種讚美。