尋日就同史友們講完朱元璋為咗確保朱家嘅江山可以千秋萬世，就算連開國功臣都可以逐個殺，咁對於曾經敵人嘅子民，佢又係點樣對付呢？
其實每逢涉及改朝換代，要點樣將原本嘅敵人變成自己嘅臣下往往都係一大學問。正當朱元璋思考呢個問題之際，就有一位大臣指出「非我族類，其心必異」。亦都係因為呢句說話，令到朱元璋明白到要江山安穩，第一步要令蒙古族變成自己嘅族類。
有別於對其他族群趕盡殺絕，當時朱元璋就下咗一道似乎唔太有殺傷力，但其實對蒙古族女性相當痛苦嘅事，就係強制佢哋必須嫁畀漢人男子。呢種強制令兩族通婚嘅手段，對當時視自身血統為最高貴嘅蒙古族而言係一大打擊，但通過漫長嘅過程，最終就可以令到漢族以及蒙古族產生後代，並且有咗後代作為後盾，自然就唔容易發生反叛情況。
咁史友可能會問，如果蒙古女子反抗又會點樣？原來如果蒙古女子反抗，先係會被痛打80大棍，及後再被限制內部通婚並且發配為奴隸，真係相當殘忍！
原圖嚟自網絡