上次阿史講咗成吉思汗鐵木真個仔窩闊台文治武功奠定蒙古帝國嘅國基，今次就要講講佢哥哥朮赤嘅事蹟，而佢嘅一生就可以以不幸嚟形容。
朮赤係成吉思汗嘅長子，媽媽亦係成吉思汗嘅正妻孛兒帖。朮赤一直以勇猛見稱，隨成吉思汗東征西伐，包括進攻金國同花剌子模等，後嚟成吉思汗封佢為欽察汗，守護蒙古帝國最西邊嘅領土。
朮赤又打得又係長子，理應深得成吉思汗信任，偏偏朮赤到死個日仍被佢爸爸懷疑，全因為鐵木真都唔肯定佢係咪朮赤嘅親生老豆。因為响朮赤未出世前鐵木真部落被攻擊，孛兒帖被俘，到鐵木真救返佢老婆時孛兒帖已懷孕，亦係後嚟嘅朮赤，就因為唔肯定係咪親生骨肉令佢父子有所隔膜。甚至成吉思汗召佢覲見，但朮赤因病未能遠行，成吉思汗一度懷疑佢想謀反，準備出兵討伐。但後嚟成吉思汗收到嘅係朮赤病死嘅消息，呢件事亦令成吉思汗非常內疚。
朮赤死後其子斡兒答同拔都先後繼承汗位，後嚟建立左欽察汗國，而呢個汗國對中亞波斯以至東歐一帶地區影響深遠。
原圖嚟自網絡