認識明朝歷史嘅史友應該都會知道，其實明朝歷史上一共就出過十六位皇帝，而喺北京其實就有一個著名嘅皇陵叫做明十三陵。咁問題嚟喇，明朝明明出過十六位皇帝，但點解去到皇陵嘅部分就只係得返十三位呢？今次阿史就同大家講一講啦！
其實古代唔少帝皇喺生前都會搵定一個風水寶地畀自己興建陵寢，等死後可以有個安息嘅地方，明太祖朱元璋亦都唔例外。喺明朝初年，其實國都並唔係位於北京，而係喺金陵，咁所以呢位開國皇帝死後自自然然就會下葬喺紫金山嘅孝陵當中。
而另一位唔喺明十三陵嘅帝皇就係明惠帝朱允炆。喺佢上位之後冇耐，燕王朱棣就發起「靖難之變」，朱允炆下落不明，就連屍身都搵唔到，就算拉到都唔會被朱棣承認，更加冇可能被放入十三陵當中！
至於最後一位「缺席」嘅就係明景帝朱祁鈺。佢喺兄長明英宗朱祁鎮喺土木堡之變被瓦剌所俘後，先至被群臣推舉為皇。後來瓦剌議和將朱祁鎮歸還，佢就擔心自己帝位不保而將朱祁鎮軟禁。結果，喺朱祁鈺重病之時，朱祁鎮發動「奪門之變」順利復辟，所以呢位曾經嘅明景帝朱祁鈺自然就不被承認，最終要由明憲宗朱見深將佢安葬喺景泰陵。
原圖嚟自網絡