尋日就同史友們講到南沙近排有一間港人子弟學校即將開課，作為我國改革開放當中最先發展起嚟嘅地區，能夠有一間港人子弟學校建立亦都係標誌住改革開放飛躍嘅發展。咁可能唔少史友對於南沙呢個市轄區認識都未必太深，但其實呢個地方真係充滿深厚嘅歷史文化。
早排阿史就已經同大家講過「最早嘅廣州人」正正就係喺南沙鹿頸村出土，由新石器時代晚期、商代時期以及唐宋時期呢個區域都有豐富嘅文化遺存，而喺近代，南沙同樣都有重大嘅歷史事件發生，就係鴉片戰爭喇！
第一次鴉片戰爭作為中國人民反抗外來侵略嘅戰爭，其實就係以南沙虎門作為海防要塞，喺第一次鴉片戰爭前，南沙虎門炮台就一共有12個炮臺，係我國海防當中唯一一個具有三重防線嘅炮台。歷史上，虎門炮台就曾經發生三次重大戰爭，分別係鴉片戰爭當中虎門大戰嘅主戰場1841年1月7日英軍突襲大角炮台、沙角炮台，1841年2月25日英軍進攻虎門主要防線，甚至1937年仲抵抗過侵華日軍，真係一個意義相當重大嘅建築群。
雖然虎門炮台多次都被敵軍破壞，但至今都仍然保留相關遺蹟，為嘅就係令下一代可以認識中華民族爭取民族解放嘅奮鬥歷程！
原圖嚟自網絡