今時今日如果鬧人「衣冠禽獸」，大家腦海中都會浮現出果個人品德敗壞、做過好多下流之事，但其實喺明朝初年，人人都想成為「衣冠禽獸」！
咁當然，明初所指嘅「衣冠禽獸」並唔係穿戴住衣帽嘅禽獸，而係指緊明朝嘅文武官員。要知道古代嘅皇帝都係以龍自比，咁同龍聚首一堂嘅自然就係禽、獸，咁所以喺朝堂之上嘅文武百官，佢哋嘅服飾都係會有明確規定。就好似文官官服上會繡禽就好似仙鶴、錦雞、孔雀、雲雁等、武將官服上繪獸例如就有獅子、老虎、豹子、熊等，所以最初文武官員就係被稱為「衣冠禽獸」，係唔少民間百姓嚮往嘅目標。
之不過，時間去到明朝中晚期，官場就開始腐敗，官員貪贓枉法、欺壓百姓，「衣冠禽獸」自此就變成貶義詞喇！
原圖嚟自網絡