早幾日阿史先同史友們介紹完三星堆出土咗首件帶翼嘅神獸，消息一傳出已經令到唔少考古文博愛好者相當興奮，點知話口未完，呢個神奇嘅遺址又再有新發現喇！
近日，三星堆遺址嘅8號坑就成功出土咗一件大型嘅立人神獸，據指呢個發現係迄今為止三星堆出土眾多動物造型青銅器當中最大嘅一件！自1986年三星堆首次發掘至今，其實一直出土嘅都係比較細小嘅神獸像，一般嚟講就只有20-30cm長度，但今次出土嘅呢件神獸像無論係高度定係長度都達到1米左右，真係相當罕見。
據考古團隊展示嘅相片，呢具神獸像體型龐大、擁有巨口、立耳、長尾、粗腿等等，造型相當生動。而且，神獸胸前仲刻有一棵神樹，係直接喺表面鑄造，喺神獸頭頂犄角上仲有一個立人，都係極罕見嘅發現。如果有機會，阿史都想親見睇下呢件文物啊！
原圖嚟自網絡