之前阿史講過古代九品官員係咪真係芝麻官，今次阿史就想講講九品中正制同曹操。
相信史友們都好清楚，九品中正制係曹丕在位時採納時任吏部尚書陳群提出嘅選拔人才制度，主要內容係响各州郡選擇賢有識見嘅官員任中正，查訪評定州郡人士，將呢啲人分成上上、上中、上下、中上、中中、中下、下上、下中、下下九等，作為吏部授官依據。原本呢個制度係為咗能夠更真實反映官員嘅能力，但點知後嚟演變到論官員都從世家大族中選定，造成「上品無寒門，下品無世族」嘅情況。整個魏晉南北朝時期都以此制選官，甚至唐宋時代呢種大族大戶觀念都無消除到。
最近阿史就睇到一位內地年輕學者撰寫嘅文章，佢其中一個論點都幾有趣，就係話九品中正制有違曹操選才用才嘅方針。點解咁講呢？因為東漢時期各地地方士族壟斷咗官場，即使有察舉制都未必選得到真正人才，而曹操本身算係响呢個環境下受打壓都被欺負嘅一群，即使做咗丞相仍然被啲士族賤視，所以佢用人就相當破格，大膽起用一啲寒門子弟，成就咗大業。簡單而言就係曹操用人係以才為本，但九品中正制就講究門戶背景，所以呢位仁兄先會話曹丕設九品中正制有違佢老豆曹操用人方針。
呢個講法當然係一家之言，唔知史友們又有乜見解呢？
原圖：《新三國》劇照