如果史友們有寫過支票又或者簽合約嘅話，應該都知道凡係用中文寫數字嘅時候，都要需要用到「壹、貳、叄、肆、伍」呢啲字嚟表達數目，但唔知大家又有冇諗過，其實呢啲複雜寫法嘅寫字係同明朝嘅開國皇帝朱元璋有關呢？阿史今次就同大家講一講啦！
要知道明朝喺開國初期，其實官場上都有唔少貪污嘅風氣，例如就有戶部侍郎郭桓喺任職期間利用職權大肆侵吞政府錢糧、漁鹽等物，數字足足達到2400萬石精糧，幾乎就係全國秋糧實征總數。大案尚且如此，仲有唔少地方官吏都係咁樣做。
相傳呢位明朝開國皇帝為咗整頓呢種歪風，就不惜研究呢啲官員貪污嘅手法。結果，朱元璋就發現唔少官員都會喺數字上下手腳，原因係一、二、三、十、百等等呢啲數字比較單純，要改筆畫並唔係困難嘅事。於是，一種複雜嘅數字寫法就咁樣出現。
原圖嚟自網絡