提起我國嘅詩人詞人，相信史友們都可以講出詩仙、詩聖、詩佛、詩鬼等等嘅稱號，但以「懶」見稱嘅詩人唔知史友們又有冇聽過呢？呢位「詩人」一生就係憑住半首詩作令到自己任途順利，今次史友們就同大家介紹一下蘇麟。
出生於公元969年嘅蘇麟其實本身嘅官職係杭州屬縣巡檢，官職嚟講就真係唔算大。不過佢好在有個好上司，當時范仲淹擔任杭州知府，唔少佢原本嘅下屬得到佢推薦提拔之下仕途都順順利利。睇到唔少同僚都升官，蘇麟竟認為自己能力並唔差，但偏偏自己就冇得到舉薦就真係好唔甘心，於是佢就搵咗個機會前往同范仲淹見面。
蘇麟深知如果一見面就叫范仲淹舉薦自己並唔係一個明智之舉，於是佢就諗到獻詩！喺宋·俞文豹《清夜錄》當中就有記載到呢件事，乃獻詩云：「近水樓台先得月，向陽花木易逢春。」詩句意思就係指靠近水邊嘅樓台因為冇樹木阻擋而可以見到月亮、同時靠近陽光嘅花木都可以得到更好嘅光照而健康生長。換言之，靠近范仲淹嘅蘇麟多年都不得志，又係咪可以得到提拔重用呢？呢句正正就係蘇麟想表達嘅意思，而范仲淹亦都真係讀懂詩句，並且好快就寫信為佢舉薦喇！
原圖嚟自網絡