今時今日由於全球化嘅關係，中西文化交流頻繁，大家對於外來嘅事物接受程度都比較高，但喺古代，古人對於呢啲外國嘅新事物就唔係咁易接受到喇！喺清朝康熙年間，康熙皇帝就曾經試食過一種食品，試到後來直頭禁止呢種食品入口，阿史今次就同大家講一講啦！
其實喺清朝皇帝當中，康熙係其中一位對西方文化比較有興趣，並且願意學習科學、天文、醫學等知識。而喺1693年京城盛行瘧疾，就連康熙都不幸中招，即使御醫翻遍各個古籍，都搵唔到方法醫治。正當宮中亂成一遍之時，法國傳教士白晉、張誠求見，並且拎出「金雞納霜」治好皇帝。
亦都係因為呢次經歷，康熙皇帝就對西方嘅事物更加感興趣，佢得知傳教士都會飲用、食用一種叫做「綽科拉」嘅食品，於是佢都想嘗試。呢度所指嘅「綽科拉」係指朱古力，雖然有提神嘅作用，但以前嘅「綽科拉」係比較苦口，並唔係人人都接受到。結果喺康熙皇帝飲咗第一口之後，就畀呢種苦味嚇怕，即時就回應「殊未盡善，著再詢問。綽科拉不必送」，甚至仲冇將呢種食品引入中國。
原圖嚟自網絡