如果單純由材質上而言，紙嘅堅硬程度絕對比唔上鐵，但如果阿史同大家講，喺古代嚟講，紙係曾經被用嚟製作鎧甲，而且防禦力甚至堪比鐵甲，唔知史友們又信唔信呢？
其實關於「紙鎧甲」嘅講法喺《新唐書》當中就已經有記載，當中就提到唐末一名節度使徐商遇到突厥軍隊入侵，喺缺乏資源之下，雖然佢徵召到過千人，但就冇鎧甲等裝備。於是，佢就下令以紙製作鎧甲，結果順利清除突厥軍隊。就咁聽可能大家都覺得唔可信，而且咁多年實物都冇件，令到「紙鎧甲」一說變成傳說。之不過，2004年嘅一件貴州出土嘅文物就解決咗呢個謎團！
當時喺貴州省田家寨村青槓垻就出土咗一件異常輕嘅鎧甲，表面睇嚟同鐵甲好似冇乜分別，但實情就係以「紙」製成！考古學家對呢件文物進一步研究，就發現材料係混合枸樹皮紙、棉，經過反覆搥打，令到紙鎧甲彈性非常好而且具有防禦作用，喺沿海地區使用唔單止可以防生鏽，仲相當輕便！
原圖嚟自網絡