繼續同史友們介紹我國最新嘅考古發現，喺展開工程之時發現到以往嘅遺址就唔係咩新鮮事，但唔知史友們又有冇聽過喺考古遺址公園當中又可以再次發掘到新嘅大型城池遺址呢？
近日喺曾經當選「全國十大考古新發現」嘅江蘇省無錫市鴻山國家考古遺址公園入面，考古團隊經過勘探之後就發現到一座春秋戰國時期大型城池遺址——吳家浜遺址。關於呢座遺址，其實早喺2019年就已經有當地農民開挖溝渠時就意外搵到大量陶片， 而經過進一步考古研究所介入勘探，發現城牆遺存並且喺上年已經對遺址三個地方進行發掘。
經過對出土文物特徵分析、碳14測定後，考古團隊就認為呢座遺址應該就係春秋晚期至戰國早期城池，而且整體城池結構由內城、外城、城廓足足佔地80萬平方米，並有九十九口水井。城內西南面都有城牆保護，東北面就有河流作為屏障，喺古代城內更加係以水路作為主要交通方式，真係稱得上係一座「水城」！
原圖嚟自網絡