繼續同史友們探討一啲古裝劇集當中經常都見到，但又唔知有咩用意嘅歷史小知識。喺唔少劇集當中，大家都可以見到古人嘅衣服都係誇張地整到好長，衫尾直頭就會拖埋落地下，到底咁樣做又有咩原因呢？阿史今次就同大家講一講啦！
喺古代，布料係一樣極為珍貴嘅資源，所以整一件好長嘅衣服並唔係普通人可以負擔得嚟。之不過，假如能夠整到呢啲服飾嘅人，都必定係非富則貴。如果係普通嘅貴族，身邊就會有好多人服侍，件衫會唔會長到拖地根本唔係佢哋需要考慮嘅事，自然就會有下人為佢哋拉起衣角，甚至即時打掃區域。而假如係皇室成員，其實唔少著過嘅衣服都會即時拋棄，「服浣濯之衣」對佢哋嚟講係甚少發生嘅事。
之不過，仲有另一點需要注意，就係古裝劇當中見到嘅超誇張衣服其實都唔係常服。古代好多事物都係有嚴格嘅等級制度，只有具一定身份嘅人先可以身穿長裙，而呢種長裙亦都只有喺宴會又或者大型祭祀先會穿著。更多嘅係，一般平民日常生活都係得幾件「短打」衣服，所以咁長嘅衫係唔常見嘅！
原圖嚟自網絡