如果史友們有拜開神佛，都必定知道「武財神」就係指關羽呢個歷史人物，之不過一生忠義仁勇嘅關羽其實一直都被譽為「武聖」，到底點解又會同「財神」扯上關係呢？阿史今次就同大家講一講啦！
其實中國民間係有四大財神，范蠡憑做生意發大財、趙公明就係成仙嘅道士保佑買賣公平、比干則係理財有方嘅官員，但偏偏喺史料記載當中，關羽呢個歷史人物同「財」並冇太大嘅關係但點解又會同范蠡、趙公明、比干等人並列為中國民間四大財神呢？
喺古代關羽其實並冇太大名氣，佢最初就只係喺隋唐時代被佛教視為「伽藍護法」，後來道教亦都將關羽封為武財神。但佢真正知名係因為明代嘅《三國演義》流行，並且令佢受到各朝代皇帝褒封，由一個普通武將化身成「關聖帝君」。咁點解又會同「財神」扯上關係呢？
原來喺明朝時期晉商崛起，行走江湖嘅佢哋重視同鄉之情，亦都覺得本身係山西人嘅關羽好講義氣，會係出門在外嘅守護神。後來隨住晉商喺清代崛起成為強大嘅商幫，關羽就被唔少商人視為係「財神」，所以就慢慢成為一個重點供奉對象。
原圖嚟自網絡