如果史友們有玩到一款國內嘅著名手遊，應該都會知道李白喺呢個遊戲當中嘅形象定位就係一個拎住劍嘅刺客，咁到底歷史上嘅李白除咗鍾意飲酒同埋作詩之外，劍術又係咪真係好高超呢？阿史今次就同大家講一講啦！
其實關於李白劍術高超嘅記載並唔多，但就可以憑住以下呢幾個歷史人物推論到李白嘅劍術去到咩水準！李白喺唔少作品當中都有提到自己有修練劍術，而當時裴旻劍舞係號稱「大唐三絕」之一，李白後來更加拜咗裴旻為師，所以喺劍術修為以及武功底子上嚟講，李白絕對係一定嘅水準。
再講落去，李白嘅「粉絲」魏顥就喺《李翰林集》當中提咗李白唔少年輕嘅事跡，「少任俠，手刃數人」就反映李白係曾經殺過人，呢度亦都表明李白唔單止有劍術，仲有膽色。而且，李白後來仲收咗一個叫武諤嘅人作為徒弟，要有資格收徒亦都證明李白劍術足以稱為「宗師」。
之不過雖然有以上幾個人物佐證，但關於李白實際嘅戰績就真係太少，「李白劍術超群」呢個講法亦都好難完全證實到！
原圖嚟自網絡