今時今日，中國已經係世界體壇大國，近幾屆唔單止夏季奧運會有好表現，連冬奧都有相當唔錯嘅成績。
講到中國代表團參加奧運會，可能史友同阿史一樣，第一個想法就係1984年嘅洛杉磯奧運會，當年許海峰零的突破，李寧奪金奠定體壇王子地位，都係中國人至今仍然津津樂道之事。但原來，新中國第一次參加冬季奧運會，舉行地點都係响美國。
响1980年中國代表團第一次出征普萊西德湖冬奧會，當時中國代表團由趙偉昌榮任開幕式旗手，呢位速滑項目名將，連續11次奪得全能冠軍，26次打破全國紀錄。不過，由於中國代表團係第一次參賽，就無創出乜嘢好成績。而响新中國第一次參加冬奧後嘅42年，冬奧於2022年就响中國北京舉行，北京亦成為咗歷史上第一個舉辦過夏季同冬季奧運會嘅城市。
原圖：xinhuanet