如果史友們有睇到星爺套《鹿鼎記》，應該都會記得喺鰲拜被擒之後，康熙並冇即時下令殺鰲拜，反而只係關押佢喺天牢。而喺歷史上，康熙擒鰲拜後亦都只係「只關不殺」，到底當中有咩原因呢？阿史今次就同大家講一講啦！
作為清朝第四位皇帝、入關後嘅第二位皇帝，康熙帝因為年幼繼位而不得不將朝政交由輔政大臣。鰲拜雖然係康熙帝早年輔政權臣、軍功顯赫，但就因為桀驁不馴擅權、結黨營私，甚至仲唔理康熙嘅意旨擅自殺害戶部尚書蘇納海、誣陷並賜死同為輔政大臣嘅蘇克沙哈。以上嘅事件唔單止引起朝野嘩然，年少嘅康熙亦都震怒決心設計擒拿鰲拜。
結果喺康熙八年（1669年），鰲拜入宮到南書房見康熙之時，就被康熙安排負責「布庫」（滿族摔跤）嘅小太監撲倒，並且同步仲有兵部尚書王弘祚、兵部左侍郎署武英殿事黃錫袞控制京師鰲拜一黨防止作亂。隨時宣佈由康親王傑書等宣布鰲拜三十條罪狀。本來論罪鰲拜係應該廷議當斬，但康熙就表示「鰲拜歷事三朝，效力有年，不忍加誅，僅命革職，籍沒拘禁，其黨羽或死或革」。
由於康熙念在鰲拜歷事三朝，曾經跟隨皇太極征戰、輔佐順治帝登上皇位，所以最終只係將佢關押而冇殺死。冇幾耐之後，鰲拜就死於禁所之內。
原圖嚟自網絡