秦始皇陵建成至今已經有二千幾年歷史，雖然基於現今科技問題我哋仍然未能安全地發掘到秦始皇陵，但近年嚟我國仍然不斷通過儀器嘗試探究到底呢個「始皇帝」當年建陵之時運用咗咩「黑科技」，阿史今次就同大家講一講啦！
今時今日大家見到嘅秦始皇陵兵馬俑坑部分可能都已經覺得好龐大，但原來按史書記載，成個秦始皇陵分為地宮、內城、外城，整體面積係足足達到56平方公里，相等於78個故宮，真係誇張！
唔單止咁，喺《史記‧秦始皇本紀》就有記載過秦始皇陵當中係「以水銀為百川江河大海，機相灌輸」，而經過初步勘查以及汞含量檢測，專家就認為當中最少有100噸水銀。至於喺墓室設計方面，一直都流傳「九層妖塔」嘅講法，而專家根據秦始皇陵封土上嘅正方形椎體就認為「九層妖塔」嘅講法基本成立，地宮應該就係豎穴式構造，而最頂層正正就係畀秦始皇「靈魂出遊地宮」。
咁當然，目前好多嘅講法只係基於現今科技對秦始皇陵外部嘅勘探，到底係真係假，只能期待有朝一日科技發達到可以解決到以上嘅問題。
原圖嚟自網絡