近排都同史友們介紹咗唔少秦始皇陵當中嘅黑科技，即使用上現今嘅科學同埋技術，都唔確保可以安全咁對秦始皇陵進行考古發掘。咁問題嚟喇，現今嘅發掘係以「文物安全」作為首要前提，咁喺秦始皇陵建成嘅二千幾年間，到底又有冇被以「財物」為前提嘅盜墓賊偷挖過呢？
如果按照文獻睇嚟，答案就係「有」；但如果以科學嘅證據睇，答案就係「冇」，接下嚟就等阿史同大家講一講啦！其實早喺《史記 高祖本紀》當中就有記載「項羽燒秦宮室，掘始皇帝冢，私收其財物」、《漢書·劉向傳》中記載「項羽燔其宮室營宇，往者咸見發掘」，以上都表明項羽可能曾經發掘秦始皇陵。之不過，當中所指嘅秦始皇陵又係邊一部分呢？
如果大家睇埋科學嘅證據，就會知道項羽所挖嘅可能只係皇陵嘅內城、外城，事關秦始皇陵內含大量水銀嘅呢個講法就因為皇陵一帶汞含量異常而極有可能成真，但如果皇陵地宮被打開過，水銀係唔可能保存到咁耐，所以二千幾年間，秦始皇陵嘅地宮部分好有機會從未被偷挖過！
原圖嚟自網絡