武則天作為中國歷史上第一個正統嘅女皇帝，佢一生充滿唔少傳奇故事。呢位人物喺神龍元年十一月二十六日病逝，享年82歲。喺佢逝世後，佢就同唐高宗李治合葬於乾陵，除咗留有一塊令後世充滿好奇嘅無字碑之外，其實喺乾陵朱雀門外仲有61個無頭石人，到底當中有咩意思呢？阿史今次就同大家講一講啦！
以往阿史都同史友們介紹過，後世普遍認為「無字碑」嘅出現係有兩個可能，其一係武則天希望通過呢種方式表達自己嘅功德無法用文字描述，而另一個可能就係佢深知自己罪孽深重，所以唔寫碑文。正正就係因為碑文無字，所以邊個講法都有可能！
咁61個無頭石人又有咩意思呢？呢啲無頭石人同真人大細差唔多，而且背部都刻住姓名同埋嗰個人物嘅來歷，就好似「木俱罕國王斯陀勒」、「波斯王卑路斯」等等。心水清嘅史友可能都知道呢啲無頭石人正正就係「唐朝61個藩臣」，佢哋因為曾經喺唐高宗李治去世來到參加葬禮，所以武則天為咗紀念呢件事而特 設石像立喺乾陵朱雀門外嘅神道東西兩側。而呢啲石像本身都係有頭嘅，但可能最終都係受到人為破壞而被盜走，所以就變成無頭石人喇！
原圖嚟自網絡