繼續同史友們介紹我國最新考古發掘工作，早喺2015年就被上海市文物局組織國家文物局考古研究中心、上海市文物保護研究中心等單位發現嘅長江口二號古船，經過各部門77日嘅努力之下，終於都喺今日成功打撈出水。
經過7年水下考古調查勘探，考古團隊基本上就探明長江口二號古船為木質帆船，年代為清代同治時期（公元1862-1875年），所在水域水深8-10米。雖然船體埋藏於5.5米深淤泥中，但古船上嘅船艏、纜樁、主桅杆、左右舷等結構完整，推測極有可能係清代海上使用嘅沙船。
喺長達七年嘅發掘工作當中，考古團隊通過選取4個艙室進行小範圍清理，就發現內部都放有景德鎮窯瓷器等精美文物，而且當中種類繁多，唔少都可完整修復。唔單止咁，喺船體周圍仲發現到紫砂器、越南產水煙罐、木質水桶殘件等大量文物，特別係一個綠釉杯底書有「同治年制」款，為古船斷代提供重要依據。
呢次打撈嘅係目前國內乃至世界上發現體量最大、保存最為完整、船載文物豐富嘅古代木質沉船之一，古船出水後必定有更多重要發現，阿史真係相當期待！
原圖嚟自網絡