繼續同史友們介紹我國古代嘅一啲奇怪官職，以為錦衣衛、東廠呢啲官職已經夠特別？其實喺歷史上明代就有一樣叫做「朝天女戶」嘅官職，雖然成個家族都可以得到優待，但實際上就冇乜人願意去做，到底當中有咩原因呢？阿史今次就同大家講一講啦！
喺古代封建社會當中，由於古人都係「視生如視死」，所以唔單止厚葬之風興起，甚至仲有「人殉」呢種殘忍制度，由商代起嘅貴族墓穴就有唔少人殉嘅情況發現，直到秦始皇兵馬俑嘅出現先至令到相關嘅情況減少。之不過自元朝大肆鼓勵民間殉葬之下，呢種殘忍嘅方式又再次興起。
喺明代，呢種被稱為「朝天女戶」嘅官職其實就係陪葬人，呢啲被選中嘅女子雖然家族會得到優待，但佢哋自身就會為皇帝殉葬。就以明朝開國皇帝朱元璋為例，「太祖崩，宮人多從死者。建文、永樂時，相繼優恤。如張鳳、李衡、趙福、張璧、汪賓諸家，皆世襲錦衣衛千百户，人謂之『太祖朝天女户』」。所以，雖然呢啲女子嘅家族可以世襲官職，但當事人就會死得好慘烈！
原圖嚟自網絡